Afrikaans-1933/1/18

Daarna het die HERE aan hom verskyn by die eikebome van Mamre terwyl hy sit by die ingang van die tent op die warmste van die dag.
Toe het hy sy oë opgeslaan en kyk, staan daar drie menne voor hom. En toe hy hulle sien, loop hy hulle vinnig tegemoet van die ingang van die tent af en buig hom na die aarde toe.
En hy sê: HERE, as ek nou genade in u oë gevind het, gaan dan tog nie by u kneg verby nie.
Laat hulle tog ʼn bietjie water bring, en was u voete, en lê en rus onder die boom.
En laat ek ʼn stukkie brood gaan haal, en versterk u hart - daarna kan u verder gaan - want daarom het u by u kneg aangekom. En hulle antwoord: Maak soos u gesê het.
Toe loop Abraham haastig in die tent na Sara en sê: Maak gou, knie drie mate fynmeel en maak roosterkoeke.
Daarop loop Abraham na die beeste en vang ʼn jong, mooi kalf, en gee dit aan die dienaar wat dit gou klaar gemaak het.
En hy neem dikmelk en soetmelk en die kalf wat hy klaargemaak het, en sit dit hulle voor terwyl hy self by hulle onder die boom bly staan; en hulle het geëet.
Toe sê hulle vir hom: waar is Sara, u vrou? En hy antwoord: Daarin die tent.
En Hy sê: Ek sal oor ʼn jaar sekerlik weer na jou toe kom - dan sal jou vrou Sara ʼn seun hê. En Sara het geluister by die ingang van die tent wat agter Hom was.
Maar Abraham en Sara was oud, ver op hulle dae; dit het met Sara nie meer volgensdie reël van vroue gegaan nie.
En Sara het by haarself gelag en gedink: sal ek wellus hê nadat ek oud geword het, en my heer oud is?
Toe sê die HERE vir Abraham: Waarom het Sara daar gelag en gedink: Sou ek ook werklik baar noudat ek oud geword het?
Sou iets vir die HERE te wonderlik wees? Hierdie tyd, oor ʼn jaar, sal Ek na jou terugkom, en Sara sal ʼn seun hê.
Maar Sara het dit ondken en gesê: Ek het nie gelag nie; want sy was bang. Maar hy sê: Nee, maar jy het gelag.
toe staan die manne daarvandaan op, en hulle het uitgekykna die kant van Sodom; en Abraham het saam met hulle gegaan om hulle weg te bring.
Daarop sê die HERE: Sal Ek vir Abraham verberg wat Ek gaan doen
terwyl Abraham tog sekerlik ʼn groot nasie sal word, en al die nasies van die aarde in hom geseën sal word?
Want Ek het hom verkies, dat hy aan sy kinders en sy huis ná hom bevel gee dat hulle die weg van die HERE moet hou om geregtigheid en reg te doen; sodat die HERE oor Abraham kan bring wat Hy oor hom gespreek het.
Verder het die HERE gesê: Die geroep oor Sodom en Gemorra is waarlik groot, en hulle sonde is waarlik baie swaar.
Ek wil neerdaal en sien of hulle werklik gehandel het soos die geroep oor hulle is wat by My gekom het; en so nie, Ek wil dit weet.
Toe het die manne daarvandaan wegedraai en na Sodom gegaan, maar Abraham het bly staan voor die aangesig van die HERE.
En Abraham het nadergekom en gesê: Sal U ook die regverdige saam met die goddelose ombring?
Miskien is daar vyftig regverdiges binne-in  die stad; sal U hulle ook ombring en die plek nie spaar terwille van die vyftig regverdiged wat daarin is nie?
Laat dit ver van U wees om die regverdige saam met die goddelose om te bring, sodat die regverdige gelyk is met die goddelose. Laat dit ver van U wees! Sal die Regter van die ganse aarde geen reg doen nie?
Toe sê die HERE: As Ek in Sodom vyftig regverdiges vind binne-in  die stad, dan sal Ek die hele plek spaar om hulle ontwil.
En Abraham antwoord en sê: Kyk tog, ek het dit gewaag om met die HERE te spreek alhoewel ek stof en as is.
Miskien sal daar van die vyfig regverdiges vyf ontbreek; sal U terwille van die vyf die hele stad verwoes? En Hy antwoord: Ek sal dit nie verwoes as ek vyf en veertig vind nie.
En hy het nog verder met Hom gespreek en gesê: Miskien sal daar dan veertig gevind word. En Hy antwoord: Ek sal dit terwille van die veertig nie doen nie.
Verder sê hy: Laat die HERE tog nie toornig wees nie, en mag ek nog iets sê. Miskien sal daar dertig gevind word. En Hy antwoord: Ek sal dit nie doen as Ek daar dertig vind nie.
Toe sê hy: Kyk tog, ek het dit gewaag om met die HERE te spreek. Miskien sal daar twintig gevind word. En Hy antwoord: Ek sal dit terwille van die twintig nie verwoes nie.
Toe sê hy: Laat die HERE tog nie toornig wees nie, en laat my net hierdie keer mag spreek. Miskien sal daar tien gevind word. En Hy antwoord: Ek sal dit terwille van die tien nie verwoes nie.
En die HERE het weggegaan toe Hy klaar met Abraham gespreek het, en Abraham het na sy woonplek teruggekeer.