Afrikaans-1933/1/19

En die twee engele het in die aand in Sodom aangekom terwyl Lot in die poort van Sodom sit; en toe Lot hulle sien, het hy opgestaan om hulle tegemoet te gaan en hom gebuig met die aangesig na die aarde toe
en gesê: Ag, menere, draai tog uit na die huis van u dienaar en bly die nag oor en was u voete; dan kan u vroeg opstaan en u reis voorsit. Maar hulle antwoord: Nee, ons sal liewer op sie plein vernag.
Maar hy het baie by hulle aangehou, sodat hulle na hom uitgedraai en in sy huis gekom het. En hy het vir hulle ŉ maaltyd klaargemaak en ongesuurde koeke gebak, en hulle het geëet.
Hulle het nog nie gaan slaap nie toe die manne, die manne van Sodom, die huis omsingel: jonk en oud, die hele bevolking, almal saam.
En hulle het na Lot geroep en vir hom gesê: Waar is die manne wat vannag na jou gekom het? Bring hulle na ons toe uit, dat ons hulle kan beken.
Daarop gaan Lot na hulle toe uit voor die deur en sluit die deur agter hom toe
en sê: My broers, moet tog nie kwaad doen nie.
Kyk tog, ek het twee dogters wat geen man beken het nie; laat ek dié na julle uitbring, en maak met hulle soos dit goed is in julle oë. Net aan hierdie manne moet julle niks doen nie, want daarom het hulle onder die skaduwee van my dak ingekom.
Toe antwoord hulle: Gee pad daar! En hulle sê: Hierdie een het gekom om heir as ŉ vreemdeling te vertoef en wil tog gedurig die baas speel. Nou sal ons jou meer kwaad deon as vir hulle. En hulle het sterk op die man, op Lot aangedring en nadergekom om die deur oop te breek.
Maar die manne het hulle hand uitgesteek en Lot by hulle in die huis gebring en die deur toegesluit.
Toe slaan hulle die manne wat by die deur was, klein en groot, met blindheid, sodat hulle tervegeefs na die deur gesoek het.
Daarop sê die manne vir Lot: Wie het jy hier nog? Skoonseuns en jou seuns en jou dogters en almal wat jy het in die stad - bring hulle uit die plek uit;
want ons gaan hierdie plek verwoes, omdat die geroep oor hulle groot is voor die aangesig van die HERE, en die HERE het ons gestuur om dit te verwoes.
Toe gaan Lot uit en praat met sy skoonseuns wat met sy dogters sou trou, en sê: Maak julle klaar, gaan uit hierdie plek uit, want die HERE gaan die stad verwoes. Maar hy was in die oë van sy skoonseuns soos een wat gekskeer.
En toe die dag begin breek, het die engele by Lot aangedring en gesê: Maak jou klaar, neem jou vrou en jou twee dogters wat by jou is, dat jy weens die ongeregtigheidvan die stad nie omkom nie.
Maar hy het nog getalm. Toe gryp die manne hom en sy vrou en sy twee dogters aan die hand, omdat die HERE hom wou verskoon; en hulle lei hom uit buitekant die stad.
En toe hulle hul na buite uitgelei het, sê Hy: Vlug vir jou lewe! Moenie omkyk nie, en moenie êrens in die Jordaanstreek bly staan nie. Vlug na die gebergte, dat jy nie omkom nie!
Daarop aantwoord Lot hulle: Ag nee, HERE!
Kyk tog, u kneg het genade in u oë gevind, en U het u guns groot gemaak wat U aan my bewys het deur my in lewe te behou. Maar ek is nie in staat om na die gebergte te vlug sonder dat die onheil my inhaal en ek sterwe nie.
Kyk tog, hierdie stad is naby om daarheen te vlug, en dit is klein. Laat my tog daarheen vlug - is dit nie klein nie? - dat ek kan lewe!
En Hy sê vir hom: Nou ja, Ek neem jou ook in hierdie saak in guns aan, sodat Ek die stad waar jy van gespreek het, nie sal omkeer nie.
Vlug gou daarheen, want Ek kan niks doen voordat jy daar aankom nie. Daarom noem hulle die stad Soar.
Die son het oor die aarde opgegaan toe Lot in Soar aankom.
En die HERE het swawel en vuur oor Sodom en Gemorra laat reën van die HERE uit die hemel,
en Hy het hierdie stede omgekeer en die hele Jordaanstreek, ook al inwoners van die stede en wat op die grond groei.
En sy vrou het agter hom omgekyk, en ŉ soutpilaar geword.
En Abraham het vroeg in die môre na die plek waar hy voor die aangesig van die HERE gestaan het.
Toe hy uitkyk oor Sodom en Gemorra en oor die hele land van die Jordaanstreek, sien hy dat die rook van die land optrek soos die rook van ŉ oond.
En onderwyl God die stede van die Jordaanstreek verwoes, het God aan Abraham gedink en Lot uitgelei uit die omkering toe Hy die stede omgekeer het waar Lot woonagtig was.
En Lot het uit Soar opgetrek en saam met sy twee dogters gaan woon op die gebergte, want hy was bang om in Soar te woon; daarom het hy saam met sy twee dogters in ŉ spelonk gaan woon.
En die oudste het vir die jongste gesê: Ons vader is oud, en daar is geen man in die land om, na die reël van die ganse aarde, by ons in te gaan nie.
Kom, laat ons aan ons vader wyn gee om te drink en met hom gemeenskap hou, sodat ons duer ons vader ŉ geslag aan die lewe kan hou.
Hulle gee toe dié nag aan hulle vader wyn om te drink, en die oudste het gekom en met haar vader gemeenskap gehad sonder dat hy dit gewaar het toe sy gaan lê en toe sy opstaan.
Die volgende dag sê die oudste vir die jongste: Kyk, ek het laaste nag met my vader gemeenskap gehad; laat ons hom vannag weer wyn gee om te drink; gaan dan in, hou met hom gemeenskap, dat ons duer ons vader ŉ geslag in die lewe kan hou.
Hulle gee toe dié nag weer aan hulle vader wyn om te drink, en die jongste het opgestaan en met hom gemeenskap gehad sonder dat hy dit gewaar het toe sy gaan lê en toe sy opstaan.
So is dan die twee dogters van Lot by hulle vader bevrug geword,
en die oudste het ŉ seun gebaar en Moab genoem. Hy is die vader van die Moabiete tot vandag toe.
En die jongste het ook ŉ seun gebaar en hom Ben-Ammi genoem. Hy is die vader van die kinders van Ammon tot vandag toe.