37 lines
3.2 KiB
Plaintext
37 lines
3.2 KiB
Plaintext
Verder het Elíhu aangehef en gesê:
|
|
Hoor my woorde, o wyse manne! En luister na my, u wat kennis het!
|
|
Want die oor toets woorde soos die verhemelte die spyse proe.
|
|
Laat ons vir onsself uitkies wat reg is, en onder mekaar uitvind wat goed is.
|
|
Want Job het gesê: Ek is regverdig, en God het my reg ontneem.
|
|
Ondanks my reg moet ek lieg; ongeneeslik is my pylwond, en dit sonder oortreding!
|
|
Waar is ʼn man soos Job wat godslastering drink soos water?
|
|
Wat in die geselskap loop van die werkers van ongeregtigheid en wandel saam met goddelose mense?
|
|
Want hy het gesê: Dit baat ʼn man niks dat hy ʼn welgevalle aan God het nie.
|
|
Daarom, manne van verstand, luister na my: Ver is God van goddeloosheid en die Almagtige van onreg!
|
|
Veelmeer vergeld Hy die mens na sy werk, en volgens ʼn man se wandel laat Hy hom ondervind.
|
|
Ja waarlik, God handel nie goddeloos nie, en die Almagtige verdraai nie die reg nie.
|
|
Wie het aan Hom die aarde toevertrou, en wie het die hele wêreld gegrond?
|
|
As Hy op Homself ag sou gee, sy Gees en sy asem na Hom sou terugtrek,
|
|
dan sou alle vlees tesame die asem uitblaas, en die mens sou tot stof terugkeer.
|
|
As daar dan verstand by u is, hoor dit; luister na die stem van my woorde.
|
|
Kan ook een wat die reg haat, heers? Of durf u die Regverdige, die Geweldige, veroordeel?
|
|
Durf iemand vir ʼn koning sê: Jou deugniet! vir die edeles: Jou goddelose!
|
|
Hoeveel minder vir Hom wat nie partydig is vir vorste en op die vername nie meer ag gee as op die arme nie; want hulle almal is die werk van sy hande.
|
|
In ʼn oomblik sterf hulle, en in die middel van die nag word ʼn volk in beroering gebring en hulle gaan onder, en die magtige word weggedryf - nie deur ʼn hand nie. -
|
|
Want sy oë is op die weë van die mens, en Hy sien al sy voetstappe.
|
|
Daar is geen duisternis en daar is geen diepe donkerheid waar die werkers van ongeregtigheid hulle in kan wegsteek nie.
|
|
Want Hy hoef nie lank op ʼn mens ag te gee, dat hy voor God in die gereg sou gaan nie.
|
|
Hy verpletter die geweldiges sonder ondersoek en sit ander in hulle plek.
|
|
So ken Hy dan hulle werke en werp hulle omver in die nag, sodat hulle verbrysel word.
|
|
Hy straf hulle as goddelose op die plek waar almal dit sien.
|
|
Want dáárom het hulle van Hom afgewyk en op geeneen van sy weë ag gegee nie -
|
|
om die geroep van die arme na Hom te laat kom, en dat Hy die geroep van die ellendiges sou hoor.
|
|
En gee Hý rus, wie durf Hom dan veroordeel? En verberg Hy die aangesig, wie kan Hom dan aanskou? - of dit al ʼn nasie betref of ʼn mens, almal saam;
|
|
sodat die goddelose mense nie sal regeer, sodat hulle geen strikke vir die volk sal wees nie.
|
|
Want sê iemand wel tot Gόd: Ek boet sonder dat ek sleg handel,
|
|
wat ek nie sien nie, leer U my dit; ás ek onreg gedoen het, ek sal dit nie meer doen nie? -
|
|
Moet Hy volgens u welgevalle vergelding doen? U is mos ontevrede, sodat ú moet sê wat beter is, en nie ek nie! Wat u dan weet - spreek dit uit!
|
|
Manne van verstand sal vir my sê, en ʼn wyse man wat my aanhoor:
|
|
Job spreek sonder kennis, en sy woorde is sonder verstand.
|
|
Ag, mag Job getoets word tot die end toe weens die antwoorde in die trant van kwaaddoeners.
|
|
Want hy voeg oortreding by sy sonde; onder ons spreek hy smadelik en vermenigvuldig sy woorde teen God. |