Afrikaans-1933/43/1

In die begin was die Woord, en die Woord was by God, en die Woord was God.
Hy was in die begin by God.
Alle dinge het deur Hom ontstaan, en sonder Hom het nie een ding onstaan wat onstaan het nie.
In Hom was lewe, en die lewe was die lig van die mense.
En die lig skyn in die duisternis, en die duisternis het dit nie oorweldig nie.
Daar was 'n man van God gestuur, wie se naam Johannes was.
Hy het tott 'n getuienis gekom om van die lig te getuig, sodat almal deur hom kon glo.
Hy was nie die lig nie, maar hy moes van die lig getuig.
Die waaragtige lig wat elke mens verlig, was aan kom in die wêreld.
Hy was in die wêreld, en die wêreld het deur Hom onstaan, en die wêreld het Hom nie geken nie.
Hy het na sy eiendom gekom, en sy eie mense het Hom nie aangeneem nie,
Maar almal wat Hom aangeneem het, aan hulle het Hy mag gegee om kinders van God te word, aan hulle wat in sy Naam glo;
wat nie uit die bloed of uit die wil van die vlees of uit die wil van 'n man nie, maar uit God gebore is.
En die Woord het vlees geword en het onder ons gewoon - en ons het sy heerlikheid aanskou, 'n heerlikheid soos van die Eniggeborene wat van die Vader kom - vol van genade en waarheid.
Johannes getuig van Hom en roep en sê: Dit was Hy van wie ek gesê het; Hy wat ná my kom, is my voor, want Hy was eerder as ek.
En uit sy volheid het ons almal ontvang, ja genade op genade.
Want die wet is deur Moses gegee; die genade en die waarheid het deur Jesus Christus gekom.
Niemand het ooit God gesien nie; die eniggebore Seun wat in die boesem van die Vader is, Diè het Hom verklaar.
En dit is die getuienis van Johannes toe die Jode uit Jerusalem priesters en Leviete gestuur het om hom te vra: Wie is u?
En hy het erken en nie ontken nie, maar het erken: Ek is nie die Christus nie.
Toe vra hulle hom: Wat dan? Is u Elía? En hy sê: Ek is nie. Is u die profeet? En hy antwoord: Nee.
Toe sê hulle vir hom: Wie is u? - dat ons antwoord kan gee aan die wat ons gestuur het. Wat sê u van uself?
Hy sê: Ek is die stem van een wat roep in die woestyn: Maak die pad van die Here reguit! soos Jesaja, die profeet gesê het.
En die wat gestuur was, was uit die Fariseërs.
En hulle vra hom en sê vir hom: Waarom doop u dan as u nie die Christus of Elía of die profeet is nie?
Johannes antwoord hulle en sê: Ek doop met water, maar onder julle staan Hy vir wie julle nie ken nie -
dit is Hy wat ná my kom, wat my voor is, wie se skoenriem ek nie waardig is om los te maak nie.
Dit het gebeur in Betábara, oorkant die Jordaan, waar Johannes besig was om te doop.
Die volgende dag sien Johannes Jesus na hom toe kom, en hy sê: Dáár is die Lam van God wat die sonde van die wêreld wegneem!
Dit is Hy van wie ek gesê het: Ná my kom 'n man wat my voor is, omdat Hy eerder was as ek.
En ek het Hom nie geken nie; maar dat Hy aan Israel openbaar sou word, daarom het ek gekom en met water gedoop.
En Johannes het getuig en gesê: Ek het die Gees sien neerdaal soos 'n duif uit die hemel, en Hy het op Hom gebly.
En ek het Hom nie geken nie; maar Hy wat my gestuur het om met water te doop, Hy het vir my gesê: Op wie jy die Gees sien neerdaal en op Hom bly, dit is Hy water doop met die Heilige Gees.
En ek het gesien en getuig dat Hy die Seun van God is.
Die volgende dag het Johannes weer daar gestaan en twee van sy dissipels;
en toe hy Jesus aankyk terwyl Hy daar loop, sê hy: Dáár is die Lam van God!
En twee van sy dissipels het hom dit hoor sê en Jesus gevolg.
En toe Jesus Hom omdraai en hulle sien volg, sê Hy vir hulle:
Wat soek julle? En hulle antwoord Hom: Rabbi - dit wil sê, as dit vertaal word, Meester - waar is U tuis!
Hy sê vir hulle: Kom kyk. Hulle het gekom en gesien waar Hy tuis was en dié dag by Hom gebly. En dit was omtrent vieruur,
Andréas. die broer van Simon Petrus, was een van die twee wat dit van Johannes gehoor en Hom gevolg het.
Hy het eers sy eie broer Simon gekry en vir hom gesê: Ons het die Messias gevind - dit is, as dit vertaal word, die Chritstus.
En hy het hom na Jesus gelei. Toe kyk Jesus hom aan en sê: Jy is Simon, die seun van Jona; jy sal genoem word Sefas, wat vertaal word Petrus.
Die volgende dag wou Jesus na Galiléa vertrek; en Hy het na Filippus gekyk en vir hom gesê: Volg My.
En Filippus was van Betsáida, uit die stad van Andréas en Petrus.
Filippus het Natánael gekry en vir hom gesê: Ons het Hom gevind van wie Moses in die wetzz geskrywe het: Jesus, die seun van Josef van Násaret.
En Natánael sê: Kan daar uit Násaret itets goeds wees? Filippus antwoord hom: Kom kyk.
Daarop sien Jesus Natánael na toe kom en sê van hom: Hier is waarlik 'n Israeliet in wie daar geen bedrog is nie.
Natánael antwoord en sê vir Hom: Waarvandaan ken U my? Jesus antwoord en sê vir hom: Voordat Filippus jou geroep het toe jy onder die vyeboom was, het Ek jou gesien.
Nátanael antwoord en sê vir Hom: Rabbi, U is die Seun van God, U is die Koning van Israel!
Jesus antwoord en sê vir hom: Glo jy, omdat Ek vir jou gesê het: Ek het jou onder die vyeboom gesien? Jy sal groter dinge sien as dit.
En Hy sê vir hom: Voorwaar, voorwaar Ek sê vir julle, van nou af sal julle die hemel geopend sien en die engele van God opklim en neerdaal op die Seun van die mens.