Daarna het God vir Jakob gesê: Maak jou klaar, trek op na Bet-el en woon daar; en maak daar ʼn altaar vir die God wat aan jou verskyn het toe jy op die vlug was vir jou broer Esau.
Toe sê Jakob vir sy huisgesin en vir almal wat by hom was: Verwyder die vreemde gode wat onder julle is, en reinig julle en trek ander klere aan;
en laat ons klaarmaak en optrek na Bet-el; en ek sal daar ʼn altaar maak vir die God wat my geantwoord het op die dag van my benoudheid en by my was op die weg wat ek gegaan het.
Toe gee hulle aan Jakob al die vreemde gode wat in hulle besit was, en die ringe aan hulle ore, en Jakob het dit begrawe onder die terpentynboom wat by Sigem is.
En toe hulle weggetrek het, kom daar ʼn skrik van God op die stede rondom hulle, sodat hulle die seuns van Jakob nie agternagejaag het nie.
So het Jakob dan in Lus aangekom wat in die land Kanaän is - dit is Bet-el - hy en al die mense wat by hom was,
en hy het daar ʼn altaar gebou en die plek El Bet-el genoem, omdat God daar aan hom geopenbaar is toe hy vir sy broer gevlug het.
En Debora, die oppaster van Rebbeka, het gesterwe, en sy is begrawe onderkant Bet-el, onder die eikeboom. En hulle het dit genoem: Eik van geween.
Toe verskyn God weer aan Jakob, by sy terugkoms uit Paddan-Aram, en Hy seën hom;
en God sê vir hom: Jou naam is Jakob; jy sal verder nie Jakob genoem word nie, maar Israel sal jou naam wees. En Hy het hom Israel genoem.
Verder sê God vir hom: Ek is God, die Almagtige. Wees vrugbaar en vermeerder. ʼn Nasie, ja ʼn menigte van nasies, sal van jou afstam wees, en konings sal uit jou lende voortkom.
En die land wat Ek aan Abraham en Isak gegee het, sal Ek aan jou gee; en aan jou nageslag ná jou sal Ek die land gee.
Toe het God van hom af opgevaar op die plek waar Hy met hom gespreek het.
En Jakob het ʼn gedenksteen opgerig op die plek waar Hy met hom gespreek het, ʼn gedenksteen van klip, en daarop ʼn drankoffer uitgegiet en olie daarop gegooi.
En Jakob het die plek waar God met hom gespreek het, Bet-el genoem.
Daarna het hulle van Bet-el af weggetrek. En toe daar nog ʼn kort end pad was om by Efrat te kom, moes Ragel baar; en sy het swaar gehad by die bevalling.
En terwyl sy dit swaar het by die bevalling, sê die vroedvrou vir haar: Wees nie bevrees nie, want jy het ook dié keer ʼn seun.
En toe haar siel uitgaan - want sy het gesterwe - noem sy hom Ben-Oni. Maar sy vader het hom Benjamin genoem.
So het Ragel dan gesterwe; en sy is begrawe op die pad na Efrat, dit is Betlehem.
En Jakob het ʼn gedenksteen op haar graf opgerig; dit is die gedenkteken van die graf van Ragel tot vandag toe.
En Israel het weggetrek en sy tent opgeslaan aan die anderkant van Migdal-Eder.
En terwyl Israel in dié land woon, het Ruben gegaan en met Bilha, sy vader se bywyf, gemeenskap gehad. En Israel het dit gehoor. En die seuns van Jakob was twaalf.
Die seuns van Lea was: Ruben, die eersgeborene van Jakob, daarna Símeon en Levi en Juda en Íssaskar en Sébulon.
Die seuns van Ragel: Josef en Benjamin.
En die seuns van Bilha, die slavin van Ragel: Dan en Náftali.
En die seuns van Silpa, die slavin van Lea: Gad en Aser. Dit is die seuns van Jakob wat vir hom in Paddan-Aram gebore is.
En Jakob het by sy vader Isak gekom in Mamre, by Kirjat-Arba, dit is Hebron, waar Abraham as vreemdeling vertoef het, en ook Isak.
En die dae van Isak was honderd en tagtig jaar.
En Isak het die asem uitgeblaas en gesterwe, en hy is by sy volksgenote versamel, oud en afgeleef. En sy seuns Esau en Jakob het hom begrawe.
