En nadat die HERE Job toegespreek het met hierdie woorde, sê die HERE vir Élifas, die Temaniet: My toorn het ontvlam teen jou en jou twee vriende; want julle het nie reg van My gespreek soos my kneg Job nie.
Neem dan nou vir julle sewe bulle en sewe ramme, en gaan na my kneg Job en bring ʼn brandoffer vir julle, en laat my kneg Job vir julle bid; want hom alleen sal Ek in guns aanneem, sodat Ek julle nie straf vir die dwaasheid nie; want julle het nie reg van My gespreek soos my kneg Job nie.
Toe het Élifas, die Temaniet, en Bildad, die Suhiet, en Sofar, die Naämatiet, heengegaan en gedoen soos die HERE vir hulle gesê het; en die HERE het Job in guns aangeneem.
En die HERE het die lot van Job verander toe hy vir sy vriende gebid het; en die HERE het Job se besittings vermeerder tot dubbel soveel as voorheen.
Ook het al sy broers en al sy susters en al sy bekendes van vroeër na hom gekom en met hom saam brood geëet in sy huis; en hulle het met hom medelyde gehad en hom vertroos oor al die kwaad wat die HERE oor hom gebring het. En hulle het vir hom elkeen ʼn geldstuk gegee en elkeen ʼn goue ring.
En die HERE het die einde van Job meer geseën as sy begin; en hy het veertien duisend stuks kleinvee en ses duisend kamele en duisend paar beeste en duisend eselinne gehad.
Daarby het hy sewe seuns en drie dogters gehad.
En hy het die eerste genoem Jemíma en die twede Kesía en die derde Kerenhappug.
