Spreek met Aäron en sê vir hom: As jy die lampe opsteek, dan moet die sewe lampe aan die voorkant van die kandelaar lig gee.
En Aäron het so gedoen: aan die voorkant van die kandelaar het hy dié lamp opgesteek soos die HERE Moses beveel het.
En dit was die maaksel van die kandelaar: dryfwerk uit goud; selfs sy voetstuk en sy blomme was dryfwerk; volgens die beeltenis wat die HERE Moses getoon het, so het hy die kandelaar gemaak.
En die HERE het met Moses gespreek en gesê:
Neem die Leviete onder die kinders van Israel uit en reinig hulle.
En so moet jy met hulle doen om hulle te reinig: Sprinkel op hulle water van ontsondiging; en hulle moet 'n skeermes oor hulle hele ligaam laat gaan en hulle klere was en hullself reinig.
Daarna moet hulle 'n jong bul neem en die spysoffer was daarby behoort: fynmeel met olie gemeng; en 'n ander jong bul moet jy as sondoffer neem.
En jy moet die Leviete voor die tent van samekoms laat naderkom en die hele vergadering van die kinders van Israel versamel.
Dan moet jy die Leviete voor die aangesig van die HERE laat naderkom, en die kinders van Israel moet hulle hande op die Leviete lê.
En Aäron moet die Leviete as beweegoffer beweeg voor die aangesig van die HERE namens die kinders van Israel, sodat hulle daar kan wees om die dienswerk van die HERE te verrig.
En die Leviete moet hulle hande op die kop van die bulle lê; en maak jy een as sondoffer en een as brandoffer vir die HERE klaar, om vir die Leviete versoening te doen.
Dan moet jy die Leviete stel voor Aäron en sy seuns en hulle as beweegoffer aan die HERE beweeg.
En jy moet die Leviete onder die kinders van Israel uit afsonder, dat die Leviete myne kan wees.
En daarna moet die Leviete inkom om die tent van samekoms te bedien. So moet jy hulle dan reinig en hulle as beweegoffer beweeg.
Want hulle is heeltemal aan my gegee onder die kinders van Israel uit; in die plek van alles wat die moederskoot open-al die eersgeborenes uit die kinders van Israel-het Ek hulle vir My geneem.
Want al die eersgeborenes onder die kinders van Israel is myne, van mense en van diere; op die dag toe Ek al die eersgeborenes in Egipteland getref het, het Ek hulle vir my geheilig.
En Ek het die Leviete in plek van al die eersgeborenes onder die kinders van Israel geneem
en die Leviete gegee-hulle is gegee aan Aäron en sy seuns onder die kinders van Israel uit om die dienswerk van die kinders van Israel in die tent van samekoms te verrig en om vir die kinders van Israel versoening te doen, sodat daar geen plaag mag wees onder die kinders van Israel as die kinders van Israel na die heiligdom aankom nie.
En Moses en Aäron en die hele vergadering van die kinders van Israel het met die Leviete gedoen net soos die HERE Moses aangaande die Leviete beveel het; so het die kinders van Israel met hulle gedoen.
En die Leviete het hulleself ontsondig en hulle klere gewas, en Aäron het hulle beweeg as beweegoffer voor die aangesig van die HERE; en Aäron het versoening vir hulle gedoen om hulle te reinig.
En daarna het die Leviete gekom om hulle dienswerk in die tent van samekoms voor Aäron en sy seuns verrig; soos die HERE Moses aangaande die Leviete beveel het, so het hulle met hulle gedoen.
En die HERE het met Moses gespreek en gesê:
Dit is die saak wat die Leviete aanbetref: Van vyf en twintig jaar oud en daarbo moet hy kom om sy plig te vervul by die dienswerk van die samekoms.
Maar van vyftig jaar oud moet hy vry wees van diensplig en die meer dien nie-
hy kan sy broers in die tent van samekoms behulpsaam wees om die diens waar te neem, maar dienswerk moet hy nie verrig nie.So meot hy met die Leviete doen insake hulle ampspligte.
