Verder het die HERE met Moses en Aäron gespreek en gesê:
As 'n mens in die vel van sy vlees 'n swelsel of uitslag of ligte vlek het, en die in die vel van sy vlees 'n plaag van melaatsheid word, dan moet hy na die priester Aäron of na een van sy seuns, die priesters, gebring word;
En die priester moet na die aangetaste plek in die vel van die vlees kyk. Het die hare of die plek wit geword, en lyk dit of die plek dieper is as die vel van sy vlees, dan is dit die plaag van melaatsheid. As die priester dit sien, moet hy hom onrein verklaar.
Maar as dit 'n wit vlek in die vel van sy vlees is en dit nie dieper lyk as die vel nie, en die hare daarvan nie wit geword het nie, dan moet die priester die angetaste persoon sewe dae lank opsluit.
As die priester hom op die sewende dag bekyk en sien dat die aangetaste plek, volgens hy kan sien, dieselfde gebly het, die plek nie in die vel versprei het nie, dan moet die priester hom nog 'n keer sewe dae lank opsluit.
Bekyk die priester hom dan op die sewende dag nog 'n keer en sien hy dat die aangestate plek dof van kleur geword en die plek in die vel nie versprei het nie, dan meot die priester hom rein verklaar. Dit is 'n uitslag; en hy moet sy klere was, dan is hy rein.
Maar as die uitslag werklik in die vel versprei nadat hy hom aan die priester vertoon het om rein te word, dan moet hy hom nog 'n keer aan die priester vertoon.
En sien die priester dat die uitslag in die vel versprei het, dan moet die priester hom onrein verklaar. Dit is melaatsheid.
As die plaag van melaatsheid aan 'n mens is, dan moet hy na die priester gebring word.
